தமிழ் கவிதைகள் பழக வேண்டுமா?

ஈன்றெடுத்த அன்னைக்கு ஈடாக 
என்றென்றும் கருதும் தாய்மொழி 
நாமென்றும் வணங்கும் தமிழ்மொழி ! 
புவியேப் போற்றிடும் புலவர்களும் 
அகிலமே அறிந்திட்ட அறிஞர்களும் 
கட்டிக் காத்திட்டத் தமிழ்மொழி !

மேதினி எங்கும் மேன்மையுடன் 
செவிகளில் கேட்கும் சுவையுடன் 
இலக்கணம் கொண்ட இனியதமிழ் 
இலக்கியம் நிறைந்த இனியசுவை 
காவியங்கள் தந்திடும் கனிச்சுவை 
அகத்திற்கு அளித்திடும் பல்சுவை !

செம்மொழி நிலைகண்ட எம்மொழி 
செழித்துத் தழைத்திட்ட தமிழ்மொழி 
சொத்தானது நெஞ்சில் நமக்கென்றும் ! 
முதல்மொழி மூத்தமொழி நம்மொழி 
பன்மொழிப் பாவலரும் போற்றுகின்ற 
குறள்தந்த வள்ளுவனின் தமிழ்மொழி !

தமிழர்க்கு முகவரியாம் உலகெங்கும் 
பண்பாட்டுச் சின்னமாம் பழந்தமிழும் 
வளர்ந்திடும் வாழ்ந்திடும் வையகத்தில் 
புகழ்கொடி பரப்பிடும் புவியில் என்றும் !

தமிழராய் பிறந்ததே பெருமை நமக்கும் !